Ministria për Evropën dhe Punët e Jashtme reagoi sot lidhur me deklaratat e opozitës për mosreagimin e saj për protestën e studentëve shqiptarë në protestën në Maqedoninë e Veriut, duke theksuar se “Ambasada e Shqipërisë në Shkup ka qenë në kontakt të vazhdueshëm me studentët dhe me zhvillimet në terren”.

Në një deklaratë për shtyp MEPJ thekson se “është krejt e pavërtetë dhe për më së paku e padrejtë të tentohet të krijohet përshtypja sikur shteti shqiptar ka qenë indiferent ndaj shqetësimeve të studentëve shqiptarë në Shkup. Përkundrazi, ka pasur angazhim të drejtpërdrejtë institucional dhe diplomatik”.

“Vetë Sekretari i Përgjithshëm i MEPJ, i gjendur në Shkup, është takuar personalisht me studentët për të dëgjuar shqetësimet dhe kërkesat e tyre legjitime. Institucionet shqiptare, as më parë e as në këtë rast, nuk kanë qëndruar pasive përballë kësaj situate”, nënvizon MEPJ.

Në deklaratën për shtyp të MEPJ theksohet se “është e tepërt të kujtohet se përfaqësitë diplomatike janë pjesë e Ministrisë për Evropën dhe Punët e Jashtme dhe përfaqësojnë zyrtarisht shtetin shqiptar, kudo në botë, përfshirë në Maqedoninë e Veriut. Çdo angazhim diplomatik është angazhim i vetë shtetit shqiptar”.

MEPJ sqaron se në mënyrë të veçantë, ministri për Evropën dhe Punët e Jashtme, Ferit Hoxha, ka reaguar publikisht në mbështetje të studentëve shqiptarë dhe të drejtës së tyre për përdorimin e gjuhës shqipe, duke theksuar se “përdorimi i gjuhës amtare është një e drejtë themelore, e garantuar nga Kushtetuta e Maqedonisë së Veriut dhe Ligji për Përdorimin e Gjuhëve, e cila nuk mund dhe nuk duhet të ngushtohet apo vonohet nga asnjë procedurë”.

Po ashtu, ministri Hoxha ka vlerësuar qëndrimin e studentëve, të cilët sipas tij, meritojnë përgëzim për angazhimin qytetar dhe mënyrën demokratike me të cilën kanë artikuluar kërkesën e tyre.

“Njëkohësisht, duhet kuptuar se diplomacia ka kodet, format dhe mekanizmat e saj të komunikimit dhe veprimit. Jo çdo angazhim institucional bëhet domosdoshmërisht publik në kohë reale dhe as reflektohet menjëherë në rrjetet sociale apo në deklarata mediatike. Shpesh, puna diplomatike zhvillohet përmes kontakteve të drejtpërdrejta, komunikimeve institucionale dhe kanaleve zyrtare, me qëllim arritjen e rezultateve konkrete dhe efektive. Kjo çështje kërkon përgjegjësi dhe seriozitet, jo deklarata politike për konsum mediatik”, thuhet në deklaratën e MEPJ-së.

Burimi ATSH