Ministri i Turizmit, Kulturës dhe Sportit, Blendi Gonxhja njoftoi sot se janë drejt përfundimit punimet e fazës së parë restauruese përforcuese në Muzeun Historik Kombëtar, në kuadër të programit EU4Culture, financuar nga Bashkimi Evropian dhe zbatuar nga UNOPS në bashkëpunim me MTKS.

Ministri përcolli në rrjetet sociale pamje nga kantieri i punimeve në Muzeun Historik Kombëtar.

Pas përfundimit të ndërhyrjeve në fasadë dhe heqjes së skelave mbrojtëse, tashmë zbulohet pamja e restauruar e godinës, ndërsa vazhdon puna për përfundimin e plotë të fazës së parë të implementimit të ndërhyrjeve strukturore.

Drejtoresha e MHK, Elenita Roshi, shpjegoi se, fillimisht u restaurua Mozaiku Shqipëria dhe pastaj pjesa tjetër e fasadës se Muzeut Historik Kombëtar.

“Ajo çfarë po ndodh këtu është përforcimi dhe krijimi i një strukture shumë të fortë dhe të qëndrueshme ndaj tërmeteve. Muzeut Historik Kombëtar i është shtuar jeta”, thotë Elenita Roshi duke treguar pamje nga pavijoni i ikonografisë në MHK, ku duken ikonat e paketuara. Roshi tregon se ikonat janë paketuar prej fillimit të punimeve në vitin 2024 dhe do të qëndrojnë ashtu deri në përfundimin e plotë të tyre.

Marrë nga ATSH