Ministrja e Arsimit Mirela Kumbaro mori pjesë sot në konferencën “Drejt një tregu global të arsimit të lartë, ndryshimet në ligj”, organizim i “Ligës së Universiteteve Gjon Durrahium”, me fokus tek propozimet e lidhura me rishikimin e ligjit të arsimit të lartë.

Lidhur me universitetet si partnere në ligjin e ri për arsimin e lartë, ministrja Kumbaro, në fjalën e saj u shpreh: “Nëse gjërat ndërtohen që në themel mirë, përmes një procesi komunikimi të hapur dhe me gjithëpërfshirje, marrin edhe vlerën në kohë, përtej një mandati. Që në nëntor, u jam drejtuar me një letër të gjitha universiteteve në vend, për të marrë prej tyre eksperiencën e bashkëjetesës 10-vjecare me ligjin e arsimit të lartë”.

Më tej, ministrja Kumbaro bëri me dije se është ngritur grupi i punës në ministri, me përfaqësues rektorësh, e po ashtu edhe një grup teknik me ekspertë dhe pedagogë të drejtësisë, ku të gjitha sugjerimet e ardhura prej këtyre institucioneve po filtrohen, po analizohen e po reflektohen në seanca të gjata.

“Fryma e ligjit duhet të jetë e orientuar drejt studentëve dhe ndërlidhjes reale me tregun e punës. Ky numër IAL-sh në raport me vendin tonë, na çon drejt dy rrugëve: profilizimin e universiteteve dhe ndërkombëtarizimin. Ne duhet ta shohim këtë realitet, përmes lenteve të profilizimit dhe ndërkombëtarizimit, ku sot loja nuk zhvillohet brenda kufijve tanë, zhvillohet në një arenë ndërkombëtare, me dinamizëm të lartë, me të rinj që ikin e vijnë”, vijoi ministrja Kumbaro, duke prezantuar shtyllat kryesore të vizionit për ligjin e ri të arsimit të lartë.

Gjatë kësaj konference, rektorët dhe përfaqësuesit e Ligës së Universiteteve prezantuan propozimet dhe shprehën vlerësimin për dialogun e vazhdueshëm me Ministrinë e Arsimit në procesin e rishikimit të këtij ligji.

Burimi ATSH