Dashuria e thellë e një nëne përfshihet në jetën e përditshme.

Shpenzimet e udhëtimit të kursyera, rrobat dimërore, bisedat telefonike … të gjitha këto përbëjnë dashurinë e nënës Qi Xin për djalin Xi Jinping.

Në janar të vitit 1969, Xi Jinping-u, që asokohe ende nuk kishte mbushur moshën 16 vjeçe, u largua nga shtëpia dhe shkoi në fshatin Liangjiahe në veri të provincës Shaanxi për të punuar. Para nisjes, nëna e tij Qi Xin qepi me dorë një çantë për të birin dhe qëndisi tre hieroglife mbi të: “Zemra e nënës”.

Gjatë shtatë vjetëve në Liangjiahe, kjo çantë e shoqëroi gjithmonë Xi Jinping-un.

Në atë kohë, nëna Qi Xin me djalin e vogël punonte në një fermë në provincën Henan, ndërsa dy vajzat e saj punonin në ferma të tjera.

Familja ishte e shpërndarë gjithandej dhe, kur ishte pushim, Qi Xin gjente kohë për të shkuar të vizitonte fëmijët.

Ajo shkoi në Shanxi, Shaanxi, Mongolinë e Brendshme etj., dhe rrogën e vogël të vet e shpenzonte kryesisht për udhëtim me tren.

Ato vite, Xi Jinping-u dhe nëna ishin shpesh të ndarë dhe takoheshin rrallë. Megjithatë, çanta me fjalët “Zemra e nënës” e shoqëronte gjithmonë Xi Jinping-un.

Në veri të provincës Shaanxi, Xi kapërceu vështirësi të ndryshme në jetë e në punë. Ai u zhyt në jetën e banorëve dhe vendosi si aspiratë punën në shërbim të popullit dhe atdheut.

Qi Xin është një nënë e dashur, si edhe një veterane që mori pjesë në luftë. Ajo ka punuar për shumë vjet në rajonin kufitar Shaanxi-Gansu-Ningxia, ku krijoi ndjenja të thella për masat popullore.

Një punonjës pranë Xi Zhongxun-it, babait të Xi Jinping-ut, vlerësoi se Qi Xin jetonte thjesht dhe punonte me zell.

Fjalët dhe sjelljet e nënës kanë ndikuar vazhdimisht mbi Xi Jinping-un.

Pasi u zgjodh Sekretar i Përgjithshëm i Komitetit Qendror të PKK-së, Xi Jinping-u ka vazhduar të çojë përpara punën kundër korrupsionit me guxim të madh politik dhe ndjenjë të fortë përgjegjësie. Gjatë një diskutimi me kursantët e Shkollës Qendrore të Partisë për sekretarë partie konteje, ai paralajmëroi ashpër: “Nëse do të jesh zyrtar, mos u pasuro. Nëse do të pasurohesh, mos u bëj zyrtar.”

Të qenit i rreptë me veten e kursimtar, si edhe kujdesi për njerëzit janë kërkesat dhe shpresat e Qi Xin-it për Xi Jinping-un, si edhe tradita familjare e Xi Jinping-ut.

Në vitin 1944, prindërit e Xi Jinping-ut, Qi Xin dhe Xi Zhongxun, e zhvilluan dasmën e tyre në një shpellë në provincën Shaanxi. Në atë kohë, kur sendet e përdorimit të përditshëm ishin të pakta, dikush kishte dërguar pasta dhëmbësh dhe furça dhëmbësh si dhuratë për dasmë, dhe Qi Xin-i ua shpërndau ato të gjithëve.

Shumë vjet më vonë, Qi Xin-i e kujtoi situatën në një intervistë. Ajo tha se në atë kohë, “kisha vetëm pesë vjet anëtarësim në parti dhe pesë vjet përvojë pune, por kisha një zemër revolucionare”.

Xi Jinping-u është ndikuar prej kohësh nga dhembshuria dhe ndihma e nënës së tij për të tjerët, si edhe nga përkushtimi dhe këmbëngulja e saj ndaj kauzës revolucionare.

Në verën e vitit 2000, Qi Xin-i u kthye në bazën e vjetër revolucionare në Kinën Veriperëndimore për të vizituar bashkëfshatarët e saj. Në qytezën Zhaojin të qytetit Tongchuan në Shaanxi, ajo pa se klasat e Shkollës Fillore të Ushtrisë së Kuqe “Beiliang” ishin të thjeshta dhe mjediset ishin të vjetruara. Pasi u kthye, ajo mobilizoi familjen e saj për të dhuruar 150 000 juanë për të zhvendosur dhe rindërtuar këtë shkollë.

Ndjenjat e veçanta dhe të thella për bazat e vjetra revolucionare janë rezultat i mirëkuptimit shpirtëror dhe rezonancës emocionale midis Xi Jinping-ut dhe nënës së tij Qi Xin.

Në prag të Festës së Pranverës 2015, edhe Sekretari i Përgjithshëm Xi Jinping e vizitoi Zhaojin-in gjatë turit të tij të inspektimit në Shaanxi. Ai përshëndeti fshatarët që u mblodhën rreth tij, pyeti të gjithë për përgatitjet e Vitit të Ri, nëse ishte e vështirë për fëmijët e tyre të shkonin në shkollë dhe nëse kishin ndonjë problem tjetër… Ai gjithashtu udhëzoi posaçërisht kuadrot vendase që të bënin një punë të mirë me fshatarët.

Burimi CGTN