Të enjten u mbajt në Kuala-Lumpur të Malajzisë një takim lexuesish për të diskutuar mbi versionin në gjuhën angleze të Vëllimit 5 të librit “Xi Jinping: Qeverisja e Kinës”.

Pjesëmarrësit në diskutime ranë dakord se veprat e rëndësishme të presidentit Xi Jinping mishërojnë një përvojë të madhe në fushën e zhvillimit dhe koncepte qeverisjeje që përfaqësojnë mençurinë lindore. Sidomos në sfondin e evolucionit kompleks të peizazhit aktual gjeopolitik dhe ndryshimeve të thella në sistemin global të qeverisjes, shkëmbimi i përvojave të qeverisjes midis Kinës dhe Malajzisë nëpërmjet përhapjes së këtyre veprave është me rëndësi të madhe për thellimin e miqësisë Kinë-Malajzi, besimit të ndërsjellë dhe bashkëpunimit fitimprurës për të dyja palët, si edhe për promovimin e ndërtimit të një komuniteti strategjik Kinë-Malajzi të nivelit të lartë me një të ardhme të përbashkët.

Në fjalimin e tij, kryetari i Dhomës së Përfaqësuesve të Malajzisë, Tan Sri Dato’ Dr. Johari bin Abdul, deklaroi se vepra “Xi Jinping: Qeverisja e Kinës” sqaron filozofinë e zhvillimit të Kinës, strategjitë kryesore dhe pozicionin e saj në peizazhin global, duke i ndihmuar lexuesit të fitojnë një kuptim më të thellë të logjikës ideologjike që qëndron pas politikave të Kinës. Për Malajzinë kjo nuk është vetëm një dritare për të kuptuar Kinën, por edhe një themel i rëndësishëm për zhvillimin e qëndrueshëm dhe afatgjatë të marrëdhënieve dypalëshe. Ai shprehu shpresën që të dyja palët do të shkëmbejnë pikëpamje, do të thellojnë mirëkuptimin dhe do të konsolidojnë bashkëpunimin nëpërmjet takimeve të lexuesve dhe aktiviteteve të tjera të shkëmbimit, duke kontribuuar në zhvillimin e ardhshëm të marrëdhënieve malajziano-kineze.

Foto nga chinanews.com.cn

Ministri i Transportit i Malajzisë, Anthony Loke Siew Fook, deklaroi se shtjellimet e rëndësishme në Vëllimin V të “Xi Jinping: Qeverisja e Kinës” mbi zhvillimin me cilësi të lartë, hapjen në nivel të lartë dhe nismën “Një brez, një rrugë” ofrojnë njohuri të rëndësishme për thellimin e lidhjeve midis Malajzisë dhe Kinës. Në vitet e fundit, Malajzia e Kina kanë arritur rezultate të jashtëzakonshme në bashkëpunimin me cilësi të lartë lidhur me nismën “Një brez, një rrugë” dhe pala malajziane është e gatshme të vazhdojë të thellojë shkëmbimet dhe bashkëpunimin me palën kineze në fusha të ndryshme. Ai theksoi gjithashtu që gjatë vizitës në Kinë i ndjeu thellësisht avantazhet e qeverisjes së Kinës në promovimin e zhvillimit dhe prosperitetit kombëtar duke përqendruar burimet për të përmbushur detyra të mëdha.

Neo Chee Hua, Drejtor Ekzekutiv i Qendrës Kërkimore për Shkencat Humane të Azisë Juglindore, deklaroi se “Xi Jinping: Qeverisja e Kinës” mishëron filozofinë politike të zhvillimit ekonomik e shoqëror të Kinës dhe të marrëdhënieve të saj me botën, duke hedhur një themel të rëndësishëm për thellimin dhe forcimin e bashkëpunimit Malajzi-Kinë. Me thellimin e zbatimit të Partneritetit Gjithëpërfshirës Ekonomik Rajonal (RCEP) dhe avancimin e Zonës së Tregtisë së Lirë 3.0 Kinë-ASEAN, marrëdhëniet malajziano-kineze po hyjnë në një fazë të re të sinergjisë sistemike, me perspektiva të gjera për bashkëpunim në fusha të tilla si tregtia e investimet, ekonomia digjitale dhe zhvillimi i gjelbër.

Burimi CGTN