Bujqësia, agrobiznesi dhe agroturizmi po kthehen në sektorë kyç që po nxisin rikthimin e emigrantëve dhe investimet në vendlindje, duke sjellë përvojën e fituar jashtë Shqipërisë.

Ministri i Bujqësisë dhe Zvillimit Rural, Andis Salla, gjatë një vizite në Rrogozhinë, u ndal në fabrikën e agropërpunimit Albania–Piemonte, e drejtuar nga sipërmarrësi Kujtim Skënderi. Ministri e cilësoi këtë biznes një shembull konkret i zhvillimit të zinxhirit agroushqimor në vend.

Fabrika, e ngritur në vitin 2014 pas kthimit të pronarit nga emigrimi në Itali, merret me përpunimin e domates dhe nënprodukteve të saj, si turshi, salca dhe domate të thata. “Aktualisht, ajo është ndër sipërmarrjet lider në këtë sektor, duke siguruar treg si brenda vendit ashtu edhe për eksport drejt Italisë, Zvicrës dhe vendeve të rajonit”, tha ministri.

Sipas tij, me rreth 10 punonjës dhe bashkëpunim të drejtpërdrejtë me fermerë lokalë për furnizimin me lëndë të parë, kjo sipërmarrje ka përfituar nga programet mbështetëse të qeverisë për investime në bujqësi.

“Modeli i saj konsiderohet një shembull i qëndrueshëm për rritjen e vlerës së shtuar në sektorin agroushqimor dhe për forcimin e lidhjeve mes prodhimit dhe përpunimit”, tha Salla.

Burimi ATSH