Ministri për Evropën dhe Punët e Jashtme, Ferit Hoxha, zhvilloi sot një bisedë telefonike me Anita Orban, ministren e ardhshme të Punëve të Jashtme të Hungarisë.

Gjatë bisedës, Hoxha i shprehu vlerësimin për mbështetjen e vazhdueshme politike dhe teknike që Hungaria i ka dhënë Shqipërisë dhe procesit tonë të anëtarësimit në BE.

“U dakordësuam mbi rëndësinë e forcimit të dialogut politik përmes shkëmbimeve më të shpeshta në nivel të lartë, zgjerimit të bashkëpunimit ekonomik, nxitjes së investimeve, si dhe thellimit të bashkëpunimit në sektorë kyç me interes të përbashkët”, u shpreh Hoxha në lidhje me bisedën.

“Po ashtu, shkëmbyem mendime mbi nevojën për koordinim më të ngushtë në adresimin e sfidave aktuale evropiane dhe rajonale”, theksoi Hoxha.

Hoxha tha se mirëpret angazhimin e Orbán, teksa shtoi se ndan “të njëjtin besim e gatishmëri për të punuar edhe më ngushtë së bashku, për të avancuar marrëdhëniet tona dypalëshe dhe për të kontribuar në stabilitetin, zhvillimin dhe progresin e procesit të anëtarësimit të Shqipërisë në BE, si dhe në perspektivën evropiane të rajonit”.

Burimi ATSH