Ministri për Evropën dhe Punët e Jashtme, Ferit Hoxha, reagoi sot lidhur me valën e fundit të sulmeve ruse ndaj Ukrainës.

Përmes një reagimi në rrjetin social X, Hoxha theksoi se sulmet me dronë dhe raketa kanë goditur zona civile, duke shkaktuar viktima, përfshirë dhe fëmijë. Ministri shprehu solidaritin me viktimat, të plagosurit dhe familjet e tyre.

“Ne dënojmë në termat më të ashpra valën e fundit të sulmeve të Rusisë kundër Ukrainës, gjatë së cilës dronë dhe raketa goditën zona civile, duke shkaktuar humbjen tragjike të jetëve të pafajshme, përfshirë fëmijë.

“Shprehim solidaridetin tonë për viktimat, të plagosurit dhe familjet e tyre, të cilët vazhdojnë të përballen me pasojat shkatërruese njerëzore të kësaj lufte të pajustifikueshme”, shkruan Hoxha.

Ai i cilësoi sulmet e vazhdueshme ndaj civilëve dhe infrastrukturës kritike si të papranueshme dhe në kundërshtim me të drejtën ndërkombëtare humanitare.

“Këto sulme të përsëritura dhe të vazhdueshme pa dallim kundër civilëve dhe infrastrukturës kritike janë të papranueshme dhe përbëjnë një shkelje të rëndë të së drejtës ndërkombëtare humanitare. Ato duhet të marrin fund menjëherë”, tha ai.

Në përfundim, Hoxha rikonfirmoi mbështetjen e Shqipërisë për Ukrainën dhe bëri thirrje për rritje të presionit ndërkombëtar ndaj Rusisë.

“Shqipëria rikonfirmon mbështetjen e saj të palëkundur për Ukrainën dhe popullin e saj. Mbështetja e qëndrueshme ndërkombëtare për Ukrainën, rritja e presionit ndaj Rusisë për t’i dhënë fund këtyre sulmeve, si dhe garantimi i përgjegjësisë së plotë për të gjitha shkeljet e së drejtës ndërkombëtare, mbeten thelbësore për mbrojtjen e civilëve dhe për ruajtjen e paqes dhe sigurisë në Evropë”, tha Hoxha.

Burimi ATSH