Zëvendëskryeministrja Albana Koçiu dhe ministri i Brendshëm, Besfort Lamallari morën pjesë në hapjen e ekspozitës “Publik Galeri”, një nismë që synon transformimin e hapësirave të konfiskuara në qendra arti dhe jete komunitare.

Hapësira ku është ngritur ekspozita, dikur e lidhur me përfitime të paligjshme dhe aktivitet kriminal, është shndërruar sot në një ambient të hapur për publikun, duke u kthyer në një simbol të përdorimit të aseteve të sekuestruara në shërbim të qytetarëve.

Lamallari theksoi se, kjo nismë përfaqëson një qasje të re institucionale, ku lufta kundër kriminalitetit nuk kufizohet vetëm në ndëshkim, por shoqërohet edhe me rikthimin e pasurive të përfituara në mënyrë të paligjshme në funksion të interesit publik.

Në ekspozitë kontribuojnë edhe punonjës të Policisë së Shtetit, të cilët, përtej detyrës së tyre zyrtare, prezantojnë punime artistike që reflektojnë kreativitet, ndjeshmëri dhe angazhim qytetar.

Ministri vlerësoi edhe rolin e Agjencisë së Administrimit të Pasurive të Sekuestruara dhe të Konfiskuara në krijimin e standardeve të reja për menaxhimin e aseteve të konfiskuara dhe në rritjen e besimit të qytetarëve te shteti.

Projekti “Publik Galeri” përfaqëson një shembull konkret të transformimit të pasurive të lidhura me aktivitetin kriminal në hapësira që gjenerojnë vlerë, kulturë dhe zhvillim për komunitetin.

Marrë nga ATSH