Kryeministri Edi Rama, zhvilloi sot në Vlorë një bashkëbisedim me operatorët turistik mbi sezonin turistik, rritjen e cilësisë së shërbimeve, mbështetjen për sipërmarrësit e turizmit dhe promovimin e Vlorës si një portë e rëndësishme e turizmit shqiptar në qendër të vëmendjes globale.

Gjatë fjalës së tij, kreu i qeverisë tha se ka patur një rritje të shifrave të turistëve për muajn mars, krahasuar me një vit më parë nga vende të ndryshme të Evropës si dhe nga SHBA.

“Sot po u them çfarë shifrash ka marsi tani. Në mars krahasuar me marsin e kaluar, vizitorët nga Italia janë rritur me 11%. Vizitorët nga SHBA janë rritur me 45%. Vizitorët nga Gjermania janë rritur me 23%, vizitorët nga Mbretëria e Bashkuar janë rritur me 22%, vizitorët nga Spanja janë rritur me 34 %, nga Austria me 20%, nga Norvegjia me 105%, vizitorët nga Belgjika janë rritur 4% dhe nga Danimarka me 711%. Këto janë të dhëna nga kufiri. Flas për shifrat e gjithë Shqipërisë”, tha Rama.

Kreu i qeverisë u ndal edhe te transformimi urban i Vlorës, duke kujtuar gjendjen e zonës së Lungomares një dekadë më parë.

“Vija që sot është Lungomare ishte një rrugë me dy korsi dhe në njërën ishte deti që shikohej copa-copa se ishte mbushur me ndërtime dhe nga ana tjetër ishin gropa e mbeturina nga ndërtimet e reja. Në të gjithë vazhdën e ndërtimeve në Lungomare, katet e para ishin bosh. Ky ishte realiteti. Kjo ishte Vlora para një dekadë. Për tu bërë Lungomare u deshën vitet e mandatit të parë”, Rama.

Burimi ATSH