Shqipëria po prezantohet në panairin ndërkombëtar të pasurive të paluajtshme MIPIM, që zhvillohet në Cannes, me një portofol prej 83 projektesh strategjike të lidhura me zhvillimin e turizmit, infrastrukturës dhe territorit.

Ministri për Ekonominë, Kulturën dhe Inovacionin, Blendi Gonxhja, bëri të ditur se përmes pavijonit të quajtur “Soundscapes of Albania”, të kuruar nga Agjencia Shqiptare e Zhvillimit të Investimeve dhe Agjencia Kombëtare e Planifikimit të Territorit, prezantohet potenciali turistik i Shqipërisë dhe vizioni për një turizëm cilësor, të qëndrueshëm dhe gjithëvjetor.

Sipas tij, pjesëmarrja në këtë platformë ndërkombëtare synon të promovojë mundësitë e investimeve në Shqipëri dhe të forcojë dialogun me partnerë dhe investitorë ndërkombëtarë.

“MIPIM” konsiderohet një nga ngjarjet më të rëndësishme globale për zhvillimin dhe investimet në pasuri të paluajtshme, ku marrin pjesë zhvillues, investitorë dhe përfaqësues qeverish nga shumë vende të botës.

Burimi ATSH