Universiteti Bujqësor i Tiranës (UBT) iu bashkua iniciativës ndërkombëtare “Carta di Assisi”, në kuadër të nismës “Università, Ponti di Pace”, e zhvilluar në Assisi, një nga qytetet më simbolike të paqes në botë.

UBT u bë pjesë e kësaj nisme së bashku me 16 universitete italiane dhe institucione nga Franca dhe Meksika, duke kontribuar në forcimin e dialogut akademik, bashkëpunimit shkencor dhe promovimin e vlerave të paqes në një kontekst global të shoqëruar nga sfida dhe konflikte të shumta.

Karta u firmos në emër të UBT nga zëvendës/rektorja Prof. Dr. Erinda Lika dhe Prof. Assoc. Romina Koto, duke rikonfirmuar angazhimin e universitetit për dialog ndërkulturor, përgjegjësi akademike dhe promovimin e kulturës së paqes.

“Carta di Assisi” thekson rëndësinë e universitetit si hapësirë universale për marrëdhënie dhe debat të lirë, paqen si proces të gjatë dhe formues, përgjegjësinë etike në dijen dhe vendimmarrjen akademike, si dhe lidhjen mes kërkimit shkencor, së mirës së përbashkët dhe zhvillimit të qëndrueshëm njerëzor.

Kjo nismë sipas UBT-së, konsiderohet një moment i rëndësishëm për thellimin e bashkëpunimit ndëruniversitar dhe për forcimin e rolit të universiteteve si promovues të dialogut, shkëmbimit të njohurive dhe kulturës së paqes përtej kufijve kombëtarë.

Burimi ATSH