Vogëlushët që po trajtohen në Spitalin Pediatrik të QSUT nuk mbeten pas me mësimet, ndërsa marrin kujdesin e nevojshëm për rikuperimin e tyre.

Ministrja e Arsimit, Mirela Kumbaro bëri të ditur se brenda mjediseve të spitalit, nxënësit vijojnë procesin mësimor në kushte të përshtatura, përmes dy klasave të dedikuara që zhvillojnë mësimin sipas kurrikulës shkollore, falë bashkëpunimit të Ministrisë së Arsimit me Ministrinë e Shëndetësisë.

Ministrja shprehu mirënjohje për mësueset Dhurata, Afrovit, Rajmonda dhe Lidja, të cilat me durim dhe profesionalizëm ndihmojnë pacientët e vegjël që të mos mbeten mbrapa në shkollë, edhe në ditë jo të lehta, duke garantuar vijimësinë e edukimit për fëmijët në trajtim.

Burimi ATSH