Ministrja për Evropën dhe Punët e Jashtme u prit në Kongresin amerikan nga kongresmeni Keith Self, kryetar i nënkomisionit për Evropën dhe iniciues i “Projektligjit për Vlerësimin e Diskriminimit në Luginën e Preshevës”.

Ky projektligj kërkon monitorimin dhe raportimin nga Departamenti Amerikan i Shtetit mbi trajtimin e shqiptarëve në Luginën e Preshevës.

Gjatë takimit, Spiropali theksoi se nisma e kongresmenit Self, përfaqëson një hap të rëndësishëm në ndërkombëtarizimin e problemeve serioze me të cilat përballen shqiptarët në Luginën e Preshevës dhe adresimin e tyre institucional.

“Shqipëria mbetet e përkushtuar për mbrojtjen e të drejtave të shqiptarëve kudo që ata ndodhen, në bashkëpunim me aleatët tanë”, deklaroi Spiropali.

Spiropalit do të vijojë vizitën në Uashington me takime në Departamentin Amerikan të Shtetit dhe në disa organizata e think-tanke të mendimit politik me fokus zhvillimet e fundit globale.

Burimi ATSH