Platforma më e re kombëtare e dialogut për eksportet shqiptare, “EksportON”, e hartuar nga Agjencia Shqiptare e Zhvillimit të Investimeve (AIDA), synon të krijojë një hapësirë të qëndrueshme bashkëpunimi ndërmjet institucioneve publike, agjencive mbështetëse dhe bizneseve eksportuese.

Platforma synon vendosjen e eksporteve në qendër të politikave të zhvillimit ekonomik, duke kontribuar në rritjen e vlerës së shtuar të produkteve “Made in Albania” dhe në forcimin e konkurrueshmërisë së tyre në tregjet ndërkombëtare.

Prezantimi i “EksportON” përkoi me 15-vjetorin e krijimit të AIDA-s, e cila është tashmë një institucion i konsoliduar në mbështetje të biznesit shqiptar, të investimeve vendase dhe të huaja, si dhe në promovimin e eksporteve dhe lidhjen e kompanive shqiptare me tregjet ndërkombëtare.

Në ceremoninë e prezantimit ishte i pranishëm Kryeministri Edi Rama, i cili u shpreh se “EksportON” do të shërbejë si një platformë e rëndësishme për matjen e indikatorëve që burojnë nga realiteti i përditshëm i punës së eksportuesve.

“Është një platformë që njëkohësisht do të merret me matjen e indikatorëve që vijnë nga realiteti i punës suaj të përditshme dhe që çdo vit do të nxjerrë raportin e vet mbi mënyrën se si kanë lëvizur volumet eksportuese”, tha Rama.

Sipas Kryeministrit, ky raport do t’i shërbejë qeverisë për të adresuar nevojat dhe politikat mbështetëse, ndërsa bizneseve për të kuptuar më mirë dinamikat dhe drejtimet e zhvillimit të eksporteve.

Përmes kësaj platforme, AIDA forcon rolin e saj si një nyje lidhëse mes shtetit dhe eksportuesve, duke synuar një model zhvillimi të bazuar në cilësi, inovacion dhe vlerë të shtuar për ekonominë shqiptare.

Marrë nga ATSH