Ministri i Mbrojtjes, Pirro Vengu prezantoi sot në Komisionin për Evropën dhe Punët e Jashtme projektligjin “Për importin, eksportin dhe transitin e armëve të zjarrit, të komponentëve të tyre kryesorë dhe të municioneve”.

Gjatë diskutimeve, në përgjigje të pyetjes së deputetit të Partisë së Lirisë, Edmond Haxhinasto, ministri u ndal te shqetësimet që lidhen me ndjeshmërinë e kësaj fushe, veçanërisht rrezikun e keqpërdorimit ose mosrespektimit të procedurave ligjore, çka mund të krijojë hapësira për importe ilegale apo të pakontrolluara, duke dëmtuar sistemin e gjurmueshmërisë dhe duke sjellë probleme edhe në rastet e eksporteve.

Deputeti Haxhinasto ngriti gjithashtu shqetësimin se armët e eksportuara mund të përfundojnë në zona konflikti ose në destinacione ku nuk duhet të shkojnë, duke theksuar përfshirjen e disa institucioneve në këtë proces, përfshirë doganat, dhe duke kërkuar garanci për funksionimin real të ligjit në praktikë.

Duke iu përgjigjur këtyre shqetësimeve, ministri Vengu theksoi se janë ndërmarrë masa konkrete për forcimin e mekanizmave ligjzbatues përmes bashkëpunimit me doganat dhe Autoritetit të Kontrollit Shtetëror të Eksporteve (AKShE).

Ai bëri të ditur se këto institucione kanë ngritur një program të përbashkët trajnimesh dhe stërvitjesh vjetore.

Sipas ministrit, një risi e zbatuar që nga fundi i vitit të kaluar është ndërveprimi mes sistemit të licensimit dhe atij doganor, i cili mundëson verifikime të menjëhershme mbi autorizimet ose mosautorizimet për mallra të caktuara.

Kjo, shtoi ai, ka rritur ndjeshëm ndërgjegjësimin e autoriteteve ligjzbatuese për detyrimet e tyre në pikat kufitare.

Një tjetër element i rëndësishëm i projektligjit, sipas Vengut, është roli i AKShE-së, e cila funksionon de facto edhe si agjenci ligjzbatuese dhe bashkëpunon ngushtë me Policinë e Shtetit, SPAK dhe Byronë Kombëtare të Hetimit (BKH), në raste me ndjeshmëri të veçantë.

Ministri theksoi se ndërveprimi sa më i madh online mes institucioneve është thelbësor për garantimin e kontrollit dhe transparencës.

Për këtë qëllim, u shpreh ai, projektligji parashikon një sistem të licencimit të enkriptuar, i cili mundëson gjurmueshmëri administrative në çdo hap të procesit.

Sipas tij, këto masa pritet të rrisin ndjeshëm përgjegjshmërinë dhe ndërgjegjësimin e çdo operatori ligjzbatues në pikat kufitare dhe doganore.

Marrë nga ATSH