Zëvendësministri i Bujqësisë dhe Zhvillimit Rural, Fatmir Guri deklaroi sot se ka nisur evidentimi i dëmeve në zonat e përmbytura në vend.

Në një intervistë në medie, Guri u shpreh se ekspertët ndodhen në terren, teksa shtoi se ndër zonat më të prekura, janë Shkodra, Lezha, Kurbini, Durrësi, Berati, Vlora dhe Fieri.

“Evidentimi ka nisur që në ditët e para kur u shfaqën këto problematika. Ekspertët që ka në terren Ministria e Bujqësisë, kanë qenë në dispozicion të bashkive dhe autoriteteve lokale, për të kryer së bashku procesin e evidentimit të problematikave dhe dëmeve, si pasojë e reshjeve që ranë ditët e fundit në vendin tonë”, theksoi ai.

Sipas zv.ministrit, pati një situatë anormale nga reshjet.

“Niveli i shirave që ranë për një kohë të shkurtër ishte e barabartë me nivelin disamujor të reshjeve që në vite normale bien në këto zona. Edhe funksioni i sistemit të kullimit, që ka qenë në funksionim në këto zona, nuk ka kryer plotësisht eliminimin e efekteve që vijnë nga kjo situatë anormale atmosferike”, tha Guri.

Guri nënvizoi se gjysma e buxhetit që ministria ka në dispozicion, i dedikohet pjesës së kullimit.

“Ruajtja e kanaleve kryesore dhe argjinaturave, është detyrë që ministria e mbështet me fonde të konsiderueshme. Gjysmën e buxhetit që kemi në dispozicion ia dedikojmë për pjesën e ujit dhe të kullimit. Pjesa e ruajtjes e sistemit të kullimit është detyrim i vazhdueshëm. Edhe pastrimi i kanaleve kryhet në mënyrë të vazhdueshme. Punonjësit tanë janë në terren”, u shpreh zv.ministri i Bujqësisë.

Ndër të tjera, Guri tha se në vitin 2026 është planifikuar vijimi i investimeve.

“Ne do të vazhdojmë të konsiderojmë prioritare investimet në ujitje dhe kullim, ashtu siç kemi bërë edhe më parë. Më tej, elementët që janë identifikuar si sfidues do të jenë prioritarë për mbështetje me investime gjatë vitit 2026,” u shpreh Guri.

Por sipas tij, investimet bëhen në bazë të kapaciteteve të reshjeve. “Në kushtet kur këto kapacitete tejkalohen disa herë gjatë një periudhe 3-ditore, kur kemi regjistruar 50% të reshjeve të të gjithë janarit, atëherë situata nuk lidhet vetëm me sistemin e kullimit, por edhe me reshjet anormale”, tha ai.

Guri informoi se kur evidentimi dhe analizimi i dëmeve të përfundojë, do të përcaktohet dhe vlera e dëmeve.

Burimi ATSH