Prefektura e Qarkut Durrës ka publikuar raportin e përditësuar mbi situatën e krijuar nga reshjet e shiut, duke bërë të ditur se gjendja hidrike në territor po shkon drejt normalizimit dhe nuk janë raportuar problematika të reja gjatë orëve të fundit.

Në Bashkinë Durrës, gjatë natës janë regjistruar reshje me intensitet të ulët dhe mesatar, pa shkaktuar probleme në akset rrugore apo në lumenj.

Strukturat bashkiake dhe ato operacionale të emergjencave civile vijojnë monitorimin e pandërprerë në terren.

Sipas raportit, në lumenjtë Erzen dhe Ishëm është shënuar rënie e dukshme e nivelit të ujit. Deri më tani janë evakuuar gjithsej 848 banorë, janë mbajtur 1453 akte konstatimi dhe janë verifikuar 4067 banesa.

Grupet e punës janë në terren dhe rreth 508 specialistë do të vijojnë vlerësimin e dëmeve në ditët në vazhdim.

Nga Drejtoria e Rezervave Shtetërore janë siguruar 1100 pako ushqimore, të shpërndara në disa zona të prekura. Një pjesë e tyre janë dërguar në ambientet e Kavalishencës dhe Shtëpisë së Pushimit të Ministrisë së Brendshme për qytetarët e strehuar, ndërsa pako të tjera janë shpërndarë në zonën e Durrësit të Ri (ish-Këneta), Plazh dhe Sukth.

Në zonat e Sukthit dhe Katundit të Ri raportohen rreth 2800 hektarë sipërfaqe të përmbytura.

Në Bashkinë Krujë, reshjet në zonën e Fushë-Krujës kanë qenë deri mesatare, pa krijuar probleme të reja apo prezencë uji në rrugët kryesore. Inspektimet e mëngjesit kanë konfirmuar rënie të nivelit të ujit në lumenjtë Gjole dhe Zezë, ndërsa gjatë ditës së sotme grupet e punës do të vijojnë verifikimet e dëmeve në banesa.

Po ashtu, ka përfunduar puna për bllokimin e çarjes së argjinaturës së lumit Droje.

Në Bashkinë Shijak, situata paraqitet e qetë. Reshjet gjatë natës kanë qenë me intensitet të ulët dhe mesatar, pa raportime për problematika të reja. Gjatë natës, nga strukturat e MZSH-së dhe shërbimet bashkiake është bërë pastrimi i 5 banesave dhe nxjerrja e ujit nga 2 banesa.

Autoritetet lokale dhe strukturat e emergjencave civile vijojnë të qëndrojnë në gatishmëri të plotë, ndërsa monitorimi i situatës dhe ndihma për qytetarët e prekur do të vazhdojnë deri në stabilizimin e plotë të gjendjes.

Burimi ATSH