Teatri Metropol çeli mbrëmjen e së premtes sezonin artistik me premierën e shfaqjes “Komisar Daltoniko në Teatër”.

Shfaqja ishte një homazh për regjisorin dhe aktorin e ndjerë, Naun Shundi, i cili kishte nisur punën për këtë produksion dhe kujtimi i tij mbetet prezent në çdo detaj.

Teksti origjinal i dramaturgut italian Giuseppe Della Misericordia është përshtatur nga regjisori Naser Shatrolli. Në shfaqje, komedia dhe ironia ndërthuren me reflektime mbi pushtetin dhe artin, duke krijuar një histori ku teatri përballet me autoritetin përmes situatave absurde dhe simbolike.

Në skenë interpretojnë emra të njohur të teatrit shqiptar: Bujar Asqeriu, Marius Dhrami, Rajmonda Shundi dhe Adelina Muça, të cilët sjellin me intensitet dhe finesë personazhet e veprës. Skenografia dhe kostumografia nga Sara Doda sjellin një koncept vizual të thjeshtë, por të fuqishëm, ndërsa muzika e Endri Sinës dhe asistenca regjisoriale e Maria Brokshit kompletojnë shfaqjen.

Shfaqja do të vijojë të jetë në repertorin e Teatrit Metropol edhe të shtunën dhe të dielën, duke ofruar për publikun një eksperiencë ku komedia bashkëjeton me reflektimin mbi realitetet shoqërore dhe artistike.

Burimi ATSH