Në një tryezë të organizuar nga SCiDEV dhe Faktoje.al, me temë “Liria e Shprehjes dhe Liria e Medias në Shqipëri: Midis përparimit dhe ngecjes – Reflektime mbi Raportin e BE-së 2025 dhe rruga drejt llogaridhënies”, u diskutuan sfidat dhe arritjet e vendit në këtë fushë, si dhe prioritetet për vitin 2026.

Në tryezë të pranishëm ishin deputetja e PD, Jorida Tabaku, Deputeti i Partisë “Mundësia” Erald Kapri. Po ashtu të pranishëm ishin dhe përfaqësues të botës akademike, si dhe përfaqësues të mediave, dhe organizatave mediatike në vend. Po ashtu i pranishëm ishte dhe Ambasadori i Holandës në Shqipëri, Reinout Vos

Të pranishmit ndan mendime dhe shkëmbyen ide mbi pikat kyçe të Raportit të Bashkimit Evropian 2025, duke u fokusuar mbi lirinë e shprehjes dhe të drejtën për informim si të drejta themelore të qytetarëve.

Kryetarja e Autoritetit të Mediave Audiovizive (AMA), Armela Krasniqi,theksoi se, “Liria e Shprehjes dhe e Drejta për Informim janë dy shtylla kryesore të punës sonë. Nuk bëhet fjalë vetëm për vitin 2025, por për të gjithë agjendën tonë afatgjatë, ku kemi punuar për ruajtjen e paprekur të këtyre të drejtave”.

Krasniqi përmendi disa nga arritjet më të rëndësishme të AMA-s si transparenca e Strukturës Pronësore dhe Pronarit Përfitues të mediave audio dhe audiovizive, me të dhëna të aksesueshme lehtësisht në faqen zyrtare të AMA-s;funksionimi i AMA-s si ent plotësisht i pavarur, i dëshmuar nga vendimet e arritura me konsensus dhe pa konteste; nxitja e procesit të Matjes së Shikueshmërisë për mediat audiovizive dhe përshtatjet ligjore me aktet e Bashkimit Evropian, që synojnë rregullimin e mëtejshëm të tregut audio/audioviziv.

Kryetarja e AMA-s nënvizoi gjithashtu se institucioni do të vazhdojë me të njëjtin përkushtim për të çuar përpara proceset e nisura, si dhe për çdo kontribut që shërben misionit të tij në ruajtjen dhe promovimin e lirisë së medias dhe të shprehjes në vend.

Tryeza ofroi një hapësirë dialogu konstruktiv për të reflektuar mbi sfidat aktuale dhe për të diskutuar mënyrat e avancimit të standardeve të mediave në Shqipëri, në përputhje me rekomandimet dhe praktikat e Bashkimit Evropian.

Burimi ATSH