Parku Arkeologjik i Bylisit po prezantohet në edicionin e 27-të të “Bursa Mesdhetare e Turizmit Arkeologjik– BMTA 2025, ngjarja më e rëndësishme ndërkombëtare për turizmin arkeologjik, që po zhvillohet nga 30 tetori deri më 2 nëntor në Paestum të Italisë.

Shqipëria po merr pjesë për herë të parë në këtë aktivitet, në partneritet me AICS Tirana, Agjencia Italiane për Zhvillim dhe Bashkëpunim.

Projekti i Parkut Arkeologjik të Bylisit u prezantua si shembull suksesi i bashkëpunimit mes Bashkimit Europian, Italisë dhe Shqipërisë.

Në sesionin e hapjes morën pjesë Edmondo Cirielli, Zëvendësministër i Punëve të Jashtme dhe Bashkëpunimit Ndërkombëtar të Italisë, Lira Pipa, Zëvendësministre e Turizmit, Kulturës dhe Sportit të Shqipërisë, Marco Riccardo Rusconi, Drejtor i AICS, Ugo Picarelli, Drejtor i BMTA, si dhe përfaqësues të lartë nga Siria dhe Shqipëria.

Në fjalën e saj, zv/ministrja Pipa theksoi se projekte si “Bylis dhe Antigonea tregojnë se bashkëpunimi mesdhetar kthen trashëgiminë në mundësi zhvillimi ekonomik, turizmi të qëndrueshëm dhe përfshirjeje të komuniteteve lokale”.

“Përgjatë vitit 2025, mbi 1.3 milionë turistë kanë vizituar sitet tona arkeologjike e kulturore, duke treguar interesin gjithmonë e më të lartë për turizmin kulturor në Shqipëri”, tha Pipa.

Gjatë panairit, përfaqësuesit shqiptarë u takuan me Mounir Bouchenaki, personalitet i kulturës, Këshilltar i Drejtorit të Përgjithshëm të UNESCO dhe njëkohësisht, President i Nderit të Panairit, me të cilin diskutuan për pjesëmarrjen vitin e ardhshëm, si dhe organizimin e një konference mbi trashëgiminë dhe turizmin arkeologjik në Shqipëri.

Parku Arkeologjik i Bylisit është pasuri të rrallë e trashëgimisë kulturore shqiptare dhe një nga qytetet më të ruajtura të Ilirisë. Bylis është i ndërtuar mbi një kodër që mbikëqyr luginën e Vjosës, me mure monumentale të shekullit IV para Krishtit, me një teatër mbresëlënës, mozaikë të rrallë dhe pesë bazilika paleokristiane.

Në këtë aktivitet u prezantuan pamje filmike nga Bylisi si dhe u ekspozuan disa nga gjetjet arkeologjike të këtij parku ndër vite.

BMTA është i vetmi event në botë që i kushtohet posaçërisht turizmit arkeologjik, ku takohen ekspertë, institucione, operatorë turistikë dhe kompani për të ndarë ide, projekte e bashkëpunime të reja, si dhe mundësi biznesi për operatorët.

Ky aktivitet ka si promovues rajonin e Campania-s dhe parqet arkeologjike të Paestum dhe Velia. Qëllimi i aktivitetit është të përmirësojë parqet arkeologjike dhe muzetë, të promovojë destinacionet turistike arkeologjike, të inkurajojë marketingun, të kontribuojë në zgjatjen e sezoneve dhe të rrisë mundësitë ekonomike dhe efektet e punësimit.

Një vëmendje e rëndësishme i kushtohet përdorimit të teknologjive inovative për përvojë më gjithëpërfshirëse në arkeologji dhe muzeologji.

Burimi ATSH