Në Ditën Ndërkombëtare për Veprimin Klimatik dhe në prag të Samitit të Klimës “COP30”, ministri i Mjedisit, Sofjan Jaupaj prezantoi vizionin e Shqipërisë për klimën në 4-vjeçarin e ardhshëm.

Në fjalën e tij, ministri Jaupaj theksoi se ndryshimet klimatike nuk janë më thjesht një sfidë mjedisore, por prekin çdo aspekt të jetës së përditshme, nga siguria dhe ekonomia, te mirëqenia e qytetarëve.

Ai shtoi se përmes Strategjisë Kombëtare për Ndryshimet Klimatike dhe Kontributit Kombëtar të Përcaktuar 3.0, Shqipëria po ndërton një kornizë të qartë për implementimin e vizionit të saj për klimën, duke garantuar investime në qëndrueshmëri klimatike, përshtatje ndaj ndryshimeve, sisteme paralajmërimi të hershme dhe shërbime moderne meteorologjike.

“Ky vizion nuk është thjesht një dokument, por një udhërrëfyes i qartë për veprimin konkret që ne duhet të ndërmarrim për të mbrojtur vendin tonë dhe të ardhmen e qytetarëve tanë”, deklaroi ministri.

Aktiviteti i sotëm nënvizon angazhimin e Shqipërisë për të kontribuar në përpjekjet globale për klimën dhe për të forcuar qëndrueshmërinë e vendit ndaj sfidave klimatike të shekullit 21.

Burimi ATSH