Dita Ndërkombëtare e Grave Rurale festohet çdo vit më 15 tetor, datë që nderon dhe vë në pah rolin kyç të grave që jetojnë dhe punojnë në zonat rurale, duke kontribuar ndjeshëm në zhvillimin bujqësor, sigurinë ushqimore dhe ekonominë e qëndrueshme të vendit.

Në këtë ditë simbolike, vëmendja i drejtohet jo vetëm kontributit të tyre të palodhur në sektorin bujqësor, por edhe sfidave të shumta që ato përballojnë.

Agjencia për Zhvillimin Bujqësor dhe Rural (AZHBR), bën të ditur se, në përputhje me politikat e qeverisë për fuqizimin e grave dhe barazinë gjinore në zonat rurale, ka ndërmarrë hapa konkretë për mbështetjen e tyre.

Vetëm gjatë vitit të kaluar, 7468 gra kanë përfituar nga Skema Kombëtare e Mbështetjes, një program subvencionesh që synon t’u japë grave mundësi më të mëdha për të ndërtuar sipërmarrje të qëndrueshme në bujqësi, agroturizëm dhe agroindustri.

Përmes programeve financiare, AZHBR synon jo vetëm të inkurajojë pjesëmarrjen aktive të grave në ekonomi, por edhe të nxisë barazi më të madhe në përfitimin e burimeve, trajnimeve dhe teknologjisë bujqësore moderne.

Gratë rurale janë motori i jetës në fshat ato nuk janë vetëm fermere, por gjithashtu kujdestare të familjes, ruajtëse të traditave dhe shpesh inovatore në fushën e ushqimit të qëndrueshëm dhe qëndrueshmërisë klimatike.

Në Ditën Ndërkombëtare të Grave Rurale, institucionet publike dhe partnerët ndërkombëtarë theksojnë rëndësinë e vazhdimit të përpjekjeve për rritjen e përfshirjes ekonomike të grave, përmirësimin e kushteve të jetesës në fshat dhe krijimin e mundësive të barabarta për të gjithë.

Burimi ATSH