Delegacioni i Bashkimit Evropian në Shqipëri dënoi sot vrasjen e gjyqtarit Astrit Kalaja dhe plagosjen e dy qytetarëve të tjerë në Gjykatën e Apelit Tiranë, ndërsa theksoi nevojën për rritjen e sigurisë së gjyqtarëve dhe prokurorëve.
Në një njoftim për shtyp Delegacioni i BE-së thekson se “është i tronditur nga akti i dhunës që çoi në vrasjen e gjyqtarit Kalaja dhe plagosjen e dy qytetarëve shqiptarë”.

“Ne e dënojmë me forcë këtë akt kriminal dhe shprehim ngushëllimet tona më të thella për familjen e gjyqtarit Kalaja”, thuhet në njoftim.

Delegacioni i BE-së u shpreh se “kjo tragjedi nënvizon nevojën e ngutshme që Shqipëria të rrisë sigurinë e gjyqtarëve dhe prokurorëve dhe të ndërmarrë të gjitha masat e nevojshme për të garantuar sigurinë në sallat e gjyqit. Bashkimi Evropian mbetet i palëkundur në mbështetjen e konsolidimit të reformës në drejtësi dhe të forcimit të sundimit të ligjit në vend”.

Pasditen e sotme në Gjykatën e Apelit të Juridiksionit të Përgjithshëm në Tiranë u qëllua me armë zjarri gjyqtari Astrit Kalaja, i cili për pasojë ka humbur jetën. Nga të shtënat janë plagosur gjithashtu dy persona të tjerë, palë në një proces gjyqësor.