Institucione të drejtësisë nga rajoni u mblodhën, sot, në Tiranë, në konferencën dyditore “Shërbimet e inspektimit të drejtësisë dhe sfidat e integrimit”, për të shkëmbyer përvoja, për të trajtuar sfida që lidhen me integritetin gjyqësor dhe për të diskutuar mbi rolin e tyre në procesin e integrimit në Bashkimin Evropian.

Konferenca, e para e këtij lloji, u realizua si një bashkëpunim i Prezencës së OSBE-së me Zyrën e Inspektorit të Lartë të Drejtësisë, si edhe me misionet e OSBE-së në Beograd, Podgoricë, Prishtinë, Sarajevë dhe Shkup.

Në hapje të konferencës, drejtuesi i Departamentit të Shtetit të së Drejtës dhe të të Drejtave të Njeriut në Prezencën e OSBE-së, Mauro Puzzo, tha se, reforma në drejtësi nuk është diçka që vendoset njëherë e përgjithmonë, por një proces afatgjatë, që duhet mbështetur dhe çuar përpara vazhdimisht.

“Një shembull i qartë i nevojës për vazhdimësinë e reformës është mungesa e konsiderueshme e gjyqtarëve dhe prokurorëve. Edhe pse institucionet e drejtësisë në Shqipëri kanë arritur mjaft suksese, sfidat nuk kanë mbaruar. Për shembull, Inspektori i
Lartë i Drejtësisë funksionon me më pak se gjysmën e numrit të inspektorëve të parashikuar, që prej krijimit të tij në vitin 2020”, shtoi ai.

Konferenca u përshëndet edhe nga Inspektori i Lartë i Drejtësisë, Artur Metani, Kryetari i Këshillit të Lartë Gjyqësor, Ilir Rusi dhe Kryetarja e Këshillit të Lartë të Prokurorisë, Mirela Bogdani.

Burimi ATSH