Sot shenohet Dita Ndërkombëtare e Gjuhës së Shenjave, e cila është gjuha e parë natyrore e njerëzve që nuk dëgjojnë.

Në një postim në rrjetet sociale ministrja e Arsimit, Mirela Kumbaro, ndau një mesazh të zv/ministres së Arsimit, Orjana Osmani, në gjuhën e shenjave për të gjithë njerëzit që nuk dëgjojnë.

“23 shtatori shenjon Ditën Ndërkombëtare të Gjuhës së Shenjave. Kremtojmë këtë ditë për të ndërgjegjësuar mbi rëndësinë e Gjuhës së Shenjave si një e drejtë themelore që garanton të drejtën për edukim, informim, akses në informacion dhe shërbime, interpretim, dinjitet dhe identitet gjuhësor për njerëzit që nuk dëgjojnë”, tha Kumbaro.

Ministrja Kumbaro u shpreh se “fushata “Global Leaders Change” ishte një mundësi e shkëlqyer për të ndarë mesazhe të rëndësishme në mbështetje të temës së kësaj dite: “Nuk ka të drejta të njeriut pa të drejta të gjuhës së shenjave””.

Dita Ndërkombëtare e Gjuhëve të Shenjave është një mundësi unike për të mbështetur dhe mbrojtur identitetin gjuhësor dhe diversitetin kulturor të të gjithë personave që nuk dëgjojnë dhe përdoruesve të tjerë të gjuhës së shenjave.

Asambleja e Përgjithshme e OKB-së ka shpallur 23 shtatorin si Ditën Ndërkombëtare të Gjuhëve të Shenjave me qëllim rritjen e ndërgjegjësimit për rëndësinë e gjuhës së shenjave në realizimin e plotë të të drejtave të njeriut të njerëzve që nuk dëgjojnë.

Burimi ATSH