Kryeministri Edi Rama deklaroi sot se shqiptarët kërkojnë vetëm drejtësi për Kosovën dhe çlirimtarët e saj.

Duke reaguar pas protestës së zhvilluar sot në Hagë, ku qindra shqiptarë nga e gjithë bota u mblodhën para Gjykatës Speciale në mbështetje të ish-krerëve të UÇK-së që po gjykohen në Dhomat e Specializuara për krime lufte, Rama theksoi se e vetmja kërkesë është drejtësia.

Nesër, në këtë proces, pritet nisja e dëshmive të thirrura nga mbrojtja.

“Drejtësi pra, drejtësi, vetëm drejtësi. Asgjë më shumë e asgjë tjetër përveç drejtësisë, për Kosovën dhe çlirimtarët e saj”, u shpreh Rama.

Protesta e 14 shtatorit, e thirrur nga mërgata shqiptare dhe e mbështetur nga Organizata e Veteranëve të Luftës së UÇK-së (OVL-UÇK), bashkoi shqiptarë nga vende të ndryshme të botës në shenjë solidariteti.

Në Gjykatën Speciale në Hagë po zhvillohet procesi kryesor ndaj ish-presidentit Hashim Thaçi, ish-kryeparlamentarëve Kadri Veseli e Jakup Krasniqi dhe ish-deputetit Rexhep Selimi, të akuzuar për krime lufte dhe krime kundër njerëzimit, akuza që të katërt i kanë mohuar.

Burimi ATSH