Kryetarja në detyrë e Kuvendit të Shqipërisë, Elisa Spiropali reagoi për herë të parë pas propozimit nga ana e kryeministrit Edi Rama, për ta emëruar si Ministër për Evropën dhe Punët e Jashtme.

Nëpërmjet një postimi në rrjetet sociale, Spiropali e cilësoi detyrën që i është besuar si një nder dhe përgjegjësi të madhe.

Spiropali theksoi se integrimi i Shqipërisë në BE deri në vitin 2030 është një mision historik.

“Drejt Shqipërisë 2030! Nder dhe përgjegjësi për mua që pas drejtimit të Kuvendit të Shqipërisë, të marr besimin e Kryeministrit Rama dhe Asamblesë Socialiste për të drejtuar Ministrinë për Evropën dhe Punët e Jashtme.

“Integrimi i Shqipërisë në familjen tonë natyrale evropiane brenda 2030-s nuk është thjesht objektiv politik, por misioni ynë historik. Prestigji, forca dhe dinjiteti i Shqipërisë dhe i shqiptarëve kudo janë, kanë qenë dhe do të jenë detyra e nderi i jetës sime. Me besim të palëkundur dhe shumë sfida përpara, ecim së bashku drejt të ardhmes evropiane. Mirënjohje”, shkruan Spiropali.

Ministri në detyrë për Evropën dhe Punët e Jashtme Igli Hasani nëpërmjet një reagimi në rrjetet sociale tha se “për një diplomat, është një nder i jashtëzakonshëm, por edhe një përgjegjësi e madhe të drejtojë Ministrinë për Evropën dhe Punët e Jashtme”.

“Për dy vitet e fundit, pata këtë privilegj, duke u përpjekur çdo ditë ta shoh punën me sytë e kolegëve dhe të mbështes, me përulësi, shërbimin e rëndësishëm të përfaqësimit dinjitoz të Shqipërisë dhe interesave të saj në botë”, theksoi Hasani.

Hasni nënvizoi se e ka kryer këtë detyrë me bindjen se rruga e vetme e qëndrueshme është forcimi i institucioneve dhe integriteti, dhe se diplomacia efikase i ka rrënjët në bashkëpunim, përmbajtje dhe besueshmëri.

“Faleminderit Kryeministrit Rama për besimin e dhënë dhe urime Spiropali për këtë përgjegjësi. Mirënjohës për kolegët dhe partnerët, brenda dhe jashtë vendit, që ndanë këtë rrugëtim”, shkroi Hasani.

Gjatë Asamblesë së Partisë Socialiste sot, kryeministri Edi Rama propozoi Elisa Spiropalin, si ministre për Evropën dhe Punët e Jashtme.

Burimi ATSH