Delegacioni i Bashkimit Evropian në Shqipëri uroi sot të gjithë nxënësit për një vit të ri shkollor plot suksese.

Delegacioni i BE solli në vëmendje me rastin e nisjes së vitit të ri shkollor se përmes programit EU4Schools, Bashkimi Evropian ka punuar me partnerët zbatues nga UNDP dhe me komunitetet lokale për të rindërtuar shkolla të sigurta, moderne dhe mikpritëse për të mësuar.

“61 shkolla në 11 bashki kanë përfunduar tashmë, duke u dhënë mijëra fëmijëve mundësinë të mësojnë në klasa që plotësojnë standardet e duhura”, theksoi delegacioni i BE, teksa shton se, këto shkolla nuk janë thjesht godina, janë hapësira ku rriten ëndrrat, lulëzojnë miqësitë dhe merr formë e ardhmja e gjithsecilit.

Sipas delegacionit të BE, me çdo shkollë të rindërtuar, BE-ja riafirmon angazhimin e saj për të mbështetur fëmijët e Shqipërisë dhe të ardhmen që ata meritojnë.

Burimi ATSH