Një nga projektet më të rëndësishme infrastrukturore në juglindje të Shqipërisë është tashmë realitet.

Rruga e re Qukës–Qafë Plloçë ka përfunduar dhe është vënë në funksion, duke sjellë lehtësim të ndjeshëm të qarkullimit dhe shkurtim të kohës së udhëtimit mes Tiranës dhe zonave të juglindjes së vendit.

Zëvendëskryeministrja dhe ministrja e Infrastrukturës dhe Energjisë, Belinda Balluku, ndau në rrjetet sociale pamje mbresëlënëse nga aksi i sapondërtuar, duke e cilësuar këtë rrugë jo vetëm si një investim strategjik, por edhe si një destinacion të ri për të eksploruar bukuritë natyrore shqiptare.

“Vizitoni aksin e ri Qukës–Qafë Plloçë, i cili afron juglindjen e vendit me kryeqytetin, duke hapur edhe një faqe të re zhvillimi për të gjithë zonën”, shkroi Balluku.

Rruga është ndërtuar sipas standardeve më të mira inxhinierike dhe përshkon një terren panoramik me peizazhe të rralla, duke i shtuar vlerë jo vetëm lëvizjes së qytetarëve dhe mallrave, por edhe promovimit të turizmit natyror dhe kulturor në rajon.

Me përfundimin e këtij aksi strategjik, pritet që të rritet ndjeshëm aksesueshmëria e zonave si Pogradeci, Korça dhe Librazhdi, ndërsa zhvillimi ekonomik, bujqësor dhe turistik do të marrë një hov të ri.

Burimi ATSH