Në qytetin e Korçës u përurua sot Qendra Rinore, ku të rinjtë mund të zhvillojnë talentet e tyre.

Duke e cilësuar një hapësirë e re me plot mundësi për të rinjtë, ministrja e Shtetit për Rininë dhe Fëmijët, Bora Muzhaqi tha sot se “pas një viti pune të përbashkët mes Agjencisë Kombëtare të Rinisë, bashkisë Korçë bëmë realitet një kërkesë të vetë të rinjve, për një mjedis ku të bëhen bashkë si aktorë të rëndësishëm me projekte dhe ide për komunitetin e tyre”.

“Nga artizanati te trajnimet, nga idetë te projektet në veprim, këtu gjithçka do të jetë e mundur. Sepse rinia e Korçës, meriton një shtëpi ëndrrash dhe idesh”, theksoi Muzhaqi në një postim në rrjetet sociale.

Qendra Rinore në Korçë ka një sallë kinemaje, tavolina pingpongu, bilardoje, ambientin e podcast-it, salla ku të rinjtë mund të punojnë në grupe për realizimin e projekteve shkollore e jashtëshkollore.

Bashkia e Korçës ofron edhe të tjera ambiente për të rinjtë, siç është zona sportive e qytetit dhe biblioteka, ndërsa janë të shumta edhe aktivitetet e organizuara që kanë në qendër të rinjtë.

Burimi ATSH