Kryetari i bashkisë Shkodër, Benet Beci zhvilloi sot një takim me drejtues të lartë të Bankës Gjermane të Zhvillimit (KfW) në Frankfurt dhe Tiranë.

Në këtë takim, ishin të pranishëm edhe përfaqësues të lartë të Ambasadës Gjermane në Shqipëri, si dhe përfaqësues të FSHZH-së (Fondit Shqiptar të Zhvillimit).

Sipas Becit, të gjithë këta përfaqësues, së bashku me Bankën Evropiane të Investimeve pritet të jenë investitorët dhe mbështetësit kryesorë të paketës “Porta e Alpeve”.

Kryetari i bashkisë Shkodër, u shpreh se gjatë takimit ndau me ta vizionin për realizimin e kësaj pakete të plotë investimesh, kryesisht për Shkodrën dhe në tërësi për gjithë veriun e vendit.

“Paketa “Porta e Alpeve” përfshin investime konkrete në mobilitet, bulevarde, muze dhe në turizëm. Një paketë që përcjell vizionin “Shkodra 2030””, tha Beci, ndërsa theksoi se ky është një nga hapat më të rëndësishëm drejt zhvillimit infrastrukturor të rajonit, për Shkodrën Moderne.

Paketa “Porta e Alpeve”, është një projekt që synon të forcojë rezistencën ekonomike në rajon duke përmirësuar infrastrukturën dhe krijimin e mundësive të reja.

Burimi ATSH