Drejtoria Rajonale e Trashëgimisë Kulturore Shkodër dha lajmin e mirë se për periudhën janar-korrik, Kalaja e Rozafës u vizitua nga 100.500 vizitorë.

DRTK Shkodër publikoi online edhe një album fotografik ku shfaqen grupet e turistëve të shoqëruar me guida, si edhe pamje mbresëlënëse të kalasë natën, me ndriçimin që e bën të dukshme së largu, duke i dhënë shkëlqimin e merituar.

Duke qenë atraksioni kryesor turistik i zonës, çdo turist në Shkodër ndalet në kala për një vizitë, edhe nëse ndodhet kalimthi drejt veriut të vendit. Kalaja e Shkodrës ka pozicion të atillë që nuk tërheq vetëm për vlerat e trashëgimisë historike, por edhe për peizazhet fantastike që mund të shihen prej saj, me liqenin dhe luginën e Bunës. Numri i vizitorëve në Kalanë e Rozafës, vitet e fundit ka qenë gjithnjë në rritje.

Rozafati, me një sipërfaqe prej 3,6 ha dhe një perimetër muresh rrethues prej 881 m, është objekti më i rëndësishëm i Parkut Arkeologjik Shkodër. Ajo dominon mbi një kodër shkëmbore ndërmjet lumenjve Drin dhe Buna, në hyrjen juglindore të qytetit të Shkodrës.

Burimi ATSH