Ministria e Bujqësisë dhe Zhvillimit Rural bën me dije se kontrollet për sigurinë ushqimore dhe pajisjen me faturë tatimore nuk janë aksion kundër fermerëve, por një hap për ta formalizuar, forcuar dhe mbështetur sektorin bujqësor.

MBZHR në bashkëpunim me Ministrinë e Financave dhe Administratën Tatimore, sqaron se fatura tatimore në bujqësi, ka për qëllim formalizimin e sektorit dhe garantimin e sigurisë ushqimore për të gjithë qytetarët.

Në një njoftim për mediet, MBZHR thekson se, “fermerët nuk janë fajtorë. Ata janë bashkëpunëtorë të rëndësishëm në ndërtimin e një ekonomie të ndershme dhe të sigurtë.

Qëllimi ynë nuk është të vendosim gjoba, por të krijojmë një sistem ku çdo hallkë e zinxhirit të prodhimit dhe tregtimit të produkteve bujqësore të jetë e pastër, e kontrollueshme dhe në shërbim të qytetarit”.

MBZHR vë theksin në rëndësinë e bashkëpunimit për zbatimin e kësaj nisme për gjurmueshmërinë e produkteve, që ndihmon të dimë ku është prodhuar, si është përpunuar dhe kush e ka tregtuar një produkt.

Po ashtu, për sigurinë ushqimore, për të pasur më shumë besim në atë që vendosim në tryezë.

“Transparencë dhe mbështetja, ndihmon fermerët që janë të regjistruar dhe të formalizuar të kenë akses më të lehtë në subvencione, kredi, programe zhvillimi dhe mundësi për të eksportuar”, thuhet në njoftim.

MBZHR fton të gjithë aktorët e zinxhirit agroushqimor të bashkëpunojnë për të ndërtuar një sektor të qëndrueshëm, të kontrollueshëm dhe të sigurt për konsumatorin shqiptar dhe për eksportet shqiptare, që tashmë janë prezente në mbi 80 tregje elitare ndërkombëtare.