Sekretari i Përgjithshëm i Ministrisë së Bujqësisë dhe Zhvillimit Rural, Dritan Palnikaj, mori pjesë në takimin ministror “Qëndrueshmëria, inovacioni dhe bashkëpunimi në ekonominë blu për detin Adriatik”.

Në fokus të diskutimeve ishin sfidat dhe mundësitë për zhvillimin e qëndrueshëm të sektorëve të peshkimit dhe akuakulturës në rajonin e Adriatikut.

Palnikaj theksoi angazhimin e Shqipërisë për modernizimin e infrastrukturës bregdetare dhe rritjen e konkurrueshmërisë së produkteve shqiptare të detit, përmes formalizimit të sektorit, fuqizimit të komuniteteve bregdetare dhe bashkëpunimit ndërkombëtar.

Ndërsa bëri të ditur se, në këtë kuadër, po finalizohet edhe Plani Kombëtar i Veprimit për Peshkimin Artizanal, i cili parashikon ndërtimin e nëntë pikave të uljes në zona strategjike, si Kepi i Rodonit, Velipoja, Tale dhe Liqeni i Prespës.

Ai vuri në dukje gjithashtu se Shqipëria ka përfunduar procesin e skanimit të legjislacionit dhe po punon për harmonizimin e plotë me legjislacionin europian në sektorin e peshkimit dhe akuakulturës, me objektiv përmbylljen e këtij procesi brenda vitit 2026, një hap kyç në rrugën drejt integrimit europian dhe menaxhimit të qëndrueshëm të burimeve detare.

Burimi ATSH