Në prag të votimit të raportit vjetor për Shqipërinë nga Parlamenti Europian, përfaqësuesi i shumicës socialiste, Toni Gogu, ndodhet në Strasburg për të ndjekur nga afër seancën plenare ku po diskutohet dokumenti mbi ecurinë e vendit në rrugën drejt anëtarësimit në Bashkimin Europian.

Gogu theksoi se raporti, i përgatitur nga eurodeputeti Andreas Schieder, vlerëson progresin e qëndrueshëm të Shqipërisë në reformat kyçe, përfshirë drejtësinë, shtetin e së drejtës dhe funksionimin demokratik të institucioneve.

“Shqipëria po ecën me ritmin e duhur të vendosur, të besueshëm dhe të pandalshëm drejt familjes ku i përkasim natyrshëm”, u shpreh Gogu, duke shtuar se ky raport nuk është thjesht një analizë teknike, por një pasqyrë realiste e progresit të arritur me përkushtim dhe durim.

Në raportin e miratuar më herët nga Komisioni i Jashtëm i Parlamentit Europian, veçanërisht theksohet përputhja e plotë e politikës së jashtme të Shqipërisë me atë të BE-së, si dhe roli konstruktiv i saj në rajon.

Sipas Gugut, kjo tregon “seriozitetin dhe maturinë e Shqipërisë si një vend kandidat i denjë”.

Raporti pritet të votohet nesër nga Parlamenti Europian, në seancën e fundit plenare të këtij sesioni.

/Burimi ATSH