Shqipëria i bashkohet zyrtarisht rrjetit EuroHPC (European High Performance Computing), një hap strategjik drejt forcimit të kapaciteteve kombëtare në superkompjuter dhe inteligjencë artificiale.

Drejtuesja e Agjencisë Kombëtare të Shoqërisë së Informacionit, Linda Karçanaj, u shpreh se kjo është një arritje që e afron Shqipërinë më pranë standardeve dhe infrastrukturës digjitale evropiane.

“Me mbështetjen e WBIF 9 (Western Balkans Investments Framework), jemi në proces të hartimit të një studimi fizibiliteti për ngritjen e një Qendre Kombëtare për Superkompjuter (HPC), një projekt që tashmë ka nisur të konkretizohet dhe do të përfundojë brenda vitit 2025”, tha Karçanaj.

Sipas Karçanajt, “anëtarësimi në EuroHPC ndihmon drejtpërdrejt projektet të cilat bazohen mbi inteligjencën artificiale”.

“Falë aksesit në superkompjuterë, Diella mund të trajnohet me modele më të avancuara në gjuhën shqipe, duke u bërë edhe më e shpejtë dhe më e saktë në ndihmën për qytetarët. Kjo do të thotë më shumë përgjigje në kohë reale dhe më shumë dokumente të gjeneruara automatikisht me komandë zanore. Në të njëjtën kohë, përdorimi i superkompjuterëve do të na ndihmojë të përshpejtojmë analizimin dhe përkthimin e ligjeve për harmonizim me BE-në”, vijoi ajo.

Karçanaj informoi të pranishmit se, me mbështetjen e WBIF, Shqipëria ka nisur zhvillimin e një studimi fizibiliteti kombëtar për ngritjen e një Qendre për HPC, që do t’i shërbejë një game të gjerë përdoruesish si institucione publike, akademia, ndërmarrje të vogla e të mesme, dhe start-up-e.

“Në kuadër të këtij anëtarësimi Shqipëria përfiton akses të drejtpërdrejtë në kapacitetet e përbashkëta të EuroHPC, si dhe mundësi për të marrë pjesë në projekte kërkimore me impakt të lartë”, pohoi Karçanaj.

“Superkompjuterët janë infrastruktura bazë për brezin e ardhshëm të inovacionit. Pranimi në EuroHPC nuk është vetëm një sukses teknik, është një angazhim për të ardhmen digjitale të Shqipërisë në zemër të Evropës”, tha drejtuesja e AKSHI-t.

Burimi ATSH