Bashkëpunimi ndërmjet niveleve vendore dhe ndërkombëtare u vu në qendër të diskutimit gjatë panelit “Dialogu europian për zhvillimin rajonal dhe kohezionin”, që u mbajt në Tiranë, ku morën pjesë ministri i Shtetit për Pushtetin Vendor, Arbjan Mazniku, kryetari i bashkisë së Chambery në Francë dhe ish-ministër për Europën, Thierry Repentin.

Në fjalën e tij, ministri Mazniku theksoi se një nga pikat kyçe të procesit të integrimit europian është zbatimi i legjislacionit në nivel lokal.

Sipas tij, forcimi i kapaciteteve vendore përmes krijimit të zyrave të integrimit në bashki, trajnimit të stafit dhe përfshirjes së bizneseve locale, po rezulton thelbësor për të siguruar që integrimi europian të ndikojë drejtpërdrejt në jetën e qytetarëve.

“70% të legjislacionit të BE-së zbatohet në nivel vendor, ndaj forcimi i kapaciteteve të tyre është prioriteti ynë. Me zyrat e integrimit në bashki, trajnimin e stafit dhe përfshirjen e bizneseve lokale, po krijojmë themelet që procesi i integrimit europian të ndikojë më së pari qytetarin, në mirëqenien e tij të përditshme dhe komunitetet”, tha Mazniku.

Paneli, i organizuar në kuadër të bashkëpunimit mes Shqipërisë dhe Francës, shërbeu si një platformë për të shkëmbyer eksperienca dhe për të thelluar dialogun mbi politikat e zhvillimit rajonal dhe kohezionit social në kontekstin e zgjerimit të Bashkimit Europian.

Burimi ATSH