Ministri për Europën dhe Punët e Jashtme, Igli Hasani zhvilloi sot një takim produktiv me homologun izraelit, Gideon Sa’ar.

Ky takim u zhvillua në kuadër të Konferencës Ministrore për Luftën kundër Antisemitizmit, organizuar nga Aleanca Ndërkombëtare për Përkujtimin e Holokaustit (IHRA).

“Shqipëria qëndron e palëkundur kundër çdo forme antisemitizmi, si dhe kundër çdo shprehjeje të intolerancës apo paragjykimit ndaj popullit hebre”, tha Hasani në një postim në rrjetet sociale.

Hasani bëri të ditur se gjatë takimit bënë një vlerësim pozitiv të marrëdhënieve dypalëshe mes dy vendeve.

Dy ministrat shprehën gjithashtu gatishmërinë për të vazhduar bashkëpunimin në fusha me interes të përbashkët.