Kryekomisioneri Shtetëror i Zgjedhjeve, Ilirjan Celibashi zhvilloi sot një takim informues me përfaqësinë e vëzhguesve ndërkombëtarë nga Asambleja Parlamentare e Organizatës për Siguri dhe Bashkëpunim në Evropë (OSBE PA), Asambleja Parlamentare e Këshillit të Evropës (PACE), Parlamenti Evropian (PE) dhe OSBE/ODIHR.

Sipas Celibashit, këto përfaqësi janë angazhuar në misionin vëzhgues për zgjedhjet për Kuvendin e Shqipërisë që do të mbahen më 11 maj 2025.

Në një postim në rrjetet sociale, Kryekomisioneri Celibashi shprehet se “gjatë këtij takimi, ndamë me përfaqësuesit ndërkombëtarë përgatitjet tona më të fundit në kuadër të organizimit të procesit zgjedhor, përfshirë masat që kemi ndërmarrë për të garantuar një proces të rregullt, gjithëpërfshirës dhe transparent”.

“Një vëmendje të veçantë i dhamë edhe zbatimit të teknologjisë për identifikimin biometrik të votuesve. Theksuam rëndësinë që ka për ne bashkëpunimi me institucionet ndërkombëtare dhe me misionet e vëzhgimit, si një mekanizëm i domosdoshëm për të forcuar integritetin e zgjedhjeve dhe për të rritur besimin e publikut në procesin zgjedhor”, pohon Celibashi.

Burimi ATSH