Kryetari i Partisë demokratike Sali Berisha, zhvilloi sot një takim me banorët e degëve nr. 1, 3 dhe 14, në Sheshin “Shtraus” (Xhamlliku) në Tiranë, ku prezantoi programin e koalicionit “PD – Shqipëria Madhështore”.

Berisha iu zotua një votueseje 18 vjeçare se, qëllimi i madh është që kombit t’i kthehet rinia e tij.

“Besimi juaj, zonjushë tek programi i PD është një detyrim shumë madhor për ne dhe unë ju jap fjalën ju se me këtë program, qëllimin më të madh, më final e kemi t’i kthejmë kombit rininë e tij, ta bëjmë edhe njëherë kombin të ri, siç duhet të jetë”, tha Berisha.

“Dhe kombi bëhet i ri atëherë kur moshatarët e tu, të vendosin të ndërtojnë ëndrrën shqiptare në Shqipëri”, shtoi ai.

Në këto vite, theksoi Berisha, “mijëra e mijëra, mbi 600 mijë të rinj shqiptarë, morën rrugët e botës sepse ëndrrën e tyre nuk e ndërtonin dot në Shqipëri. Pra, ëndrra, nga një ëndërr shqiptare, u shndërrua në një ëndërr që duhet të realizohej në dhera të tjera. Kjo merr fund.

Ndaj, shtoi kreu i PD, “dhe ne kemi një program që çdo i ri të shkollohet me një arsim cilësor, me dyfishim të buxhetit të arsimit”.

“Nuk do ketë mësues me rrogë minimale nën 1500 euro. Nuk do ketë mesatare që do u pengojë ju të hyni në universitete. Qeveria do bëjë gjithçka që pas përfundimit të studimeve ju të punësoheni, do paguajë sigurimet shoqërore te punëdhënësit tuaj për një vit. Do ketë fonde dhe grante për startupet tuaja dhe suksesin tuaj”, tha ai.

Berisha theksoi se, “për çdo çift të ri një çati, ky është zotimi ynë para jush”.

“Kombi në moshën e rinisë së tij kërkon që ata qindra mijëra të rinj që ikën, u larguan, të rikthehen në vendin e tyre, t’i rikthehen ëndrrës shqiptare”, nënvizoi Berisha.

“Investimet e tyre në Shqipëri për pesë vite do jenë pa asnjë taksë. Kredi të buta dhe grante do u ofrohen atyre për strehim, për biznese, për suksesin e tyre”, tha Berisha.

“Përsëri, një politikë e vendosur demografike. Sot, për shkak të emigracionit, ju e morët vesh, ne jemi kombi me treguesin e lindshmërisë më të ulët në planet sipas OKB. Ne do e përmbysim këtë. Ju garantoj se për fëmijën e parë do ketë një bonus 70 euro. Për fëmijën e dytë një bonus 60 euro. Për fëmijën e tretë dhe të katërt, të gjitha shpenzimet nga lindja gjer në moshën 23-vjeçare do jenë nga shteti”, u shpreh Berisha.

Burimi ATSH