Bashkitë e Shqipërisë tani përfaqësohen si një shoqatë e njehsuar në Rrjetin e Shoqatave të Autoriteteve Lokale të Evropës Juglindore, NALAS.

Ambasadorja e Zvicrës në Shqipëri, Ruth Huber i ka drejtuar një mesazh Asamblesë së Përgjithshme të NALAS.

Në videomesazhin e publikuar në rrjetet sociale, ambasadorja Huber tha se “jemi të lumtur që mbështesim përfshirjen dhe bashkëpunimin e të gjitha autoriteteve lokale, pavarësisht përkatësisë politike, në një platformë mbarëkombëtare dhe pluraliste”.

“Do të doja të falënderoja NALAS dhe shoqatën e qyteteve në këto kohë sfiduese në mbarë botën demokracia vendore dhe kohezioni social në Evropë kërkojnë vëmendjen tonë kolektive më shumë se kurrë. Zvicra beson në një qeverisje vendore të fortë demokratike dhe llogaridhënëse”, tha ambasadorja Huber.

Huber u shpreh se “këtu në Ballkanin Perëndimor dhe në Shqipëri ne jemi mbështetës të zjarrtë të qeverisjes vendore të pavarur, të decentralizuar dhe funksionale”.

“Siç e dini, autoritetet lokale janë përgjegjësit e parë të nevojave të qytetarëve. Nuk ka qeverisje demokratike pa një qeverisje vendore funksionale dhe demokratike. Ju përgëzoj për temën që po fokusoheni sot, politikat e bazuara në evidencë në përfshirjen sociale. Në programin tonë në Shqipëri ne kontribuojmë për këtë duke modernizuar statistikat bashkiake duke përmirësuar shërbimet dhe duke i bërë këshillat bashkiakë më transparentë”, tha ndër të tjera ambasadorja Huber.

Ambasadorja Huber u shpreh se “përveç kësaj ne kemi krijuar shërbime të reja të kujdesit social në bashki përmes një programi të përbashkët të OKB-së. Në këtë mënyrë prekim të dyja politikat e bazuara në evidencë dhe përfshirjen sociale. Megjithatë nevojitet më shumë njësi të qeverisjes vendore që bashkëpunojnë dhe mësojnë nga njëra-tjetra përtej barrierave të partive politike”.

Burimi ATSH