Drejtuesi politik i Partisë Socialiste për diasporën, Taulant Balla, zhvilloi një takim të rëndësishëm me raportuesin për Shqipërinë në Parlamentin Evropian, Andreas Schieder.

Gjatë takimit Balla dhe Schieder diskutuan mbi perspektivën e Shqipërisë për t’u anëtarësuar në Bashkimin Evropian deri në vitin 2030.

“Shqipëria anëtare e Bashkimit Evropian brenda vitit 2030 ishte tema kryesore e bisedës me raportuesin Andreas Schieder,” deklaroi Balla pas takimit.

Sipas Ballës, transformimi që ka pësuar Shqipëria në drejtim të sundimit të ligjit dhe luftës kundër pandëshkueshmërisë përbën një nga kriteret kyçe të procesit të integrimit.

“Kur morëm detyrën, Shqipëria konsiderohej botërisht ‘atdheu i pandëshkueshmërisë’. Barazia para ligjit ishte një fjalë boshe dhe sistemi i drejtësisë, një sistem padrejtësie,” tha ai.

Për ministrin Balla, reforma në drejtësi ka ndryshuar rrënjësisht perceptimin dhe funksionimin e institucioneve.

“Ne i dorëzuam drejtësisë shpatën e ndëshkimit për më të fortët, e cila mbahej nga pushteti politik qysh prej krijimit të shtetit shqiptar. Dhe për herë të parë në historinë e Shqipërisë, u çel kapitulli i hetimit dhe ndëshkimit të të pandëshkueshmëve nga një drejtësi e pavarur prej pushtetit politik. Ne do të jemi deri në fund garantët e pavarësisë së institucioneve të drejtësisë,” u shpreh ai.

Balla garantoi se Partia Socialiste mbetet e vendosur të mbrojë pavarësinë e institucioneve të drejtësisë dhe të çojë përpara procesin e integrimit evropian.

Burimi ATSH