Partia Socialiste shpalosi sot programin “Shqipëria 2030”. Në fjalën e tij kryeministri Edi Rama, njëherësh kryetar i Partisë Socialiste, u ndal edhe te rendi dhe siguria. Rama tha se numri i viktimave si pasojë e vrasjes me dashje, është ulur dy herë e gjysmë që kur morën detyrën.

“Kishim 3.8, thuajse 4 të vrarë për 100 mijë banorë, kemi 1, diçka për 100 mijë banorë”, tha Rama.

Rama shtoi se “brenda vitit 2026, 12 qytetet – qendër qarku – do të jenë të futura në programin e monitorimit me kamera inteligjente që do ta ngrenë rrjetin e integruar të sigurisë në një nivel krejt tjetër, si asnjëherë më parë, duke shpeshtuar parandalimin, duke shpejtuar kohën e reagimit ndaj keqbërësve dhe identifikimin e tyre”.

Kryeministri Edi Rama theksoi se ka një plan që të kemi amnisti periodike për gratë dhe të miturit. Një tjetër nismë e rëndësishme që Rama përmendi është edhe ngritja e Institutit për të Miturit në Konflikt me Ligjin.

“Fola për drejtësinë, por nga ana tjetër kemi drejtësinë për të gjithë, jo thjeshtë drejtësinë si luftë kundër korrupsionit në nivelet e lartë dhe këtu kemi në plan që të kemi një amnisti periodike për gratë dhe për të miturit. Dhe po ashtu, jemi shumë të përkushtuar ndaj një projekti inovativ që bëhet si modeli i parë në rajon, ndërtimi i institutit të të miturve në konflikt me ligjin, jo më vetëm burg për të miturit, por një model inovativ që bazohet në edukim, bazohet në riintegrim dhe vendos Shqipërinë në një pozicion pararojë në Bashkimin Europian, ku Franca dhe ndonjë vend tjetër janë duke eksperimentuar me shumë sukses këtë model”, tha Rama.

Rama shtoi se “po ashtu, synojmë të digjitalizojmë përfundimisht edhe sistemin e drejtësisë”.

“Shpresojmë në bashkëpunimin e pushtetit të pavarur gjyqësor në mënyrë që të kemi të një transformim në efikasitet të sistemit të drejtësisë kur vjen puna tek qytetarët”, tha Rama.

Burimi ATSH