Ministri i Ekonomisë, Kulturës dhe Inovacionit, Blendi Gonxhja ndodhet në Athinë, ku pritet të marrë pjesë në Panairin e Parë të Punës me moton “Puno & Jeto aty ku ke zemrën”, ndërsa do të jetë një prej panelistëve që do të flasin në këtë aktivitet për nivelin e pagave dhe sektorët që po njohin më shumë zhvillim në ekonominë e vendit tonë.

Ministri i MEKI-t ka ndarë disa pamje nga ky aktivitet që po zhvillohet në Athinë, duke u shprehur se “Panairi Shqiptar i Punës “Puno & Jeto aty ku ke zemrën” sjell mundësi konkrete për punësim dhe karrierë, në Shqipëri”.

“Një hapësirë ku talenti takohet me mundësitë dhe ku shqiptarët bashkohen për të ndërtuar të ardhmen e tyre, aty ku zemra rreh më fort”, thotë Gonxhja në postimin në rrjetet sociale, ndërsa u ka bërë sërish ftesë bashkëatdhetarëve shqiptarë në Greqi që t’i bashkohen këtij aktiviteti në Technopolis City (Gazi), pranë stacionit të metrosë Keramikos.

Gjatë panairit do të organizohen takime me sipërmarrje dhe agjenci shqiptare, panele diskutimi, networking dhe informacion nga tregu shqiptar i punës.