Teksa Shqipëria po i afrohet anëtarësimit në Bashkimin Europian, qeveria e ka kthyer në mision kthimin e shqiptarëve që emigruan jashtë për kushte më të mira pune e jetese.

“Puno dhe jeto, aty ku ke zemrën”, është panairi që do të hapë dyert ditën e nesërme në Greqi, për të prezantuar mundësitë dhe potencialin për rikthim e investim në atdhe të shqiptarëve që jetojnë e punojnë në Greqi.

Gladiola Dona, eksperte dhe trajnere në sektorin e hoteleri-turizmit, diplomuar në Austri në drejtimin “Turizëm”, dëshmon qartë zhvillimin dhe pagat konkurruese që sektori po ofron.

“Shqipëria nuk është më siç e lashë unë disa vite më parë kur u largova. Tashmë ka sot dhjetëra hotele me 5 yje, dhe ofrojnë standarde fantastike për të punuar në këtë sektor. Madje pagat janë të krahasueshme me vendet europiane e nganjëherë edhe më të larta, sepse industria po zhvillohet”, thotë ajo.

Ministri i Ekonomisë, Kulturës dhe Inovacionit, i cili përcolli mesazhin e Gladiolës, u bëri thirrje shqiptarëve në Greqi të vizitojnë panairin.

“Ju presim nesër në Athinë, Technopolis, në Panairin e Punës, ku do të njiheni me oferta pune dhe punëdhënës të sektorit. Eja dhe ti, bëhu pjesë e një industrie në rritje”, tha ministri.

2024-a ka rezultuar një tjetër vit rekord për turizmin me 11.7 milionë vizitorë të huaj.

Shqipëria renditet e para në listën e destinacioneve europiane me rritjen më të shpejtë të turizmit për vitin 2024, duke lënë pas shtete si Turqia, Danimarka, Portugalia, Luksemburgu, Malta dhe mjaft vende të rajonit.

Ajo ofron një kombinim unik të qyteteve historike, fshatrave tradicionale dhe peizazheve mbresëlënëse, duke e bërë një destinacion tërheqës në hartën turistike të Mesdheut, ku përveç Tiranës, sugjerohen patjetër Gjirokastra dhe Berati, të dyja pjesë e trashëgimisë botërore të UNESCO-s.

Po ashtu, vendi konsiderohet edhe një alternativë e vlefshme dhe e përballueshme krahasuar me vendet e tjera të Mesdheut.

Burimi ATSH