Menaxhimi i investimeve dhe përdorimi i fondeve të buxhetit të shtetit për zhvillimin bujqësor dhe rural ishte në fokus të takimit të drejtoreshës së përgjithshme të Agjencisë së Zhvillimit Rural dhe Bujqësor (AZHBR), Ardita Kuçi me delegacionin e IPARD të Turqisë.

Gjatë takimit, drejtoresha e AZHBR ndau përvojën e institucionit në menaxhimin e investimeve me fonde të buxhetit të shtetit.

“Diskutimet u përqendruan në strukturat e menaxhimit, metodat e zbatimit dhe kontrollet e brendshme, që janë të rëndësishme për të siguruar transparencën dhe efikasitetin e projekteve”, tha Kuçi.

Ky takim, vuri në dukje ajo, forcon më tej marrëdhëniet dhe bashkëpunimin mes dy institucioneve, duke mundësuar një shkëmbim të vlefshëm njohurish dhe praktikash për menaxhimin e investimeve dhe përdorimin e fondeve të buxhetit të shtetit.

Burimi ATSH