Në kuadër të aktiviteteve për 112-vjetorin e krijimit të Policisë së Shtetit, qindra nxënës nga i gjithë vendi kanë vizituar drejtoritë e Policisë së Shtetit në 12 qarqet.

Ditën e sotme disa nxënës ishin në Drejtorinë e Përgjithshme të Policisë së Shtetit, dhe u mirëpritën nga drejtori i Policisë së Shtetit, Ilir Proda dhe drejtues të drejtorive dhe sektorëve të ndryshëm të Drejtorisë së Përgjithshme.

Proda diskutoi me nxënësit mbi rëndësinë, imazhin dhe funksionin shumëdimensional të punonjësve të Policisë, në shoqëri.

Gjithashtu, bëri me dije se ciklet e studimit në Akademinë e Sigurisë së Policisë së Shtetit janë një mundësi e artë për nxënësit që mbarojnë gjimnazin, për t’u bërë pjesë e Policisë së Shtetit dhe në këtë mënyrë për t’i shtuar një mision të ardhmes së tyre.

Gjatë vizitës në Drejtorinë e Përgjithshme të Policisë së Shtetit nxënësit shfaqën kuriozitet dhe drejtuan pyetje mbi mënyrën e organizimit dhe funksionimit të Policisë së Shtetit, kryesisht të drejtorive dhe sektorëve që merren me hetimin e krimeve kibernetike, teknologjinë e informacionit, komandimin dhe drejtimin, sigurinë rrugore, si dhe me marrëdhënien me median dhe me qytetarët.

Drejtuesit e këtyre strukturave shoqëruan nxënësit gjatë vizitës dhe iu përgjigjën me kënaqësi pyetjeve të tyre.