Dhoma Kombëtare e Avokatisë ka vendosur ndërprerjen e bojkotit të seancave gjyqësore në Gjykatën e Posaçme kundër Korrupsionit dhe Krimit të Organizuar (GJKKO), ndërsa avokatët do t’i rikthehen normalisht proceseve gjyqësore duke nisur nga e hëna, 2 nëntor.

Vendimi u bë i ditur nga kreu i Dhomës Kombëtare të Avokatisë, Maksim Haxhia, pas mbledhjes së Këshillit të Përgjithshëm të zhvilluar sot, ku u shqyrtua situata e krijuar pas vendimit të Gjykatës Administrative të Apelit për pezullimin e efekteve të vendimeve që urdhëronin bojkotin.

Haxhia deklaroi se Dhoma do t’i përmbahet vendimit të gjykatës, ndërsa theksoi se kjo nuk nënkupton heqjen dorë nga kundërshtimet ndaj rregullores së GJKKO-së.

Ai bëri të ditur se Këshilli i Përgjithshëm ka përcaktuar grupet e punës që do të ndjekin hapat e mëtejshëm ligjorë, përfshirë paraqitjen e padisë për pezullimin dhe shfuqizimin e dispozitave të rregullores, të cilat, sipas Dhomës, cenojnë ushtrimin e profesionit të avokatit.

“Do të paraqesim padi për pezullimin dhe shfuqizimin e rregullores”, u shpreh Haxhia.

Bojkoti i avokatëve nisi më 8 shtator, në kundërshtim të rregullores së re të brendshme të GJKKO-së, e cila hyri në fuqi më 1 shtator. Një nga çështjet kryesore të kundërshtuara nga avokatët ishte kufizimi i përdorimit të telefonave celularë gjatë seancave gjyqësore.

Më 23 shtator, Dhoma Kombëtare e Avokatisë vendosi zgjerimin e bojkotit edhe në seancat për vlerësimin e masave të sigurimit personal.

Ndërkohë, më 28 tetor, Gjykata Administrative e Apelit pranoi kërkesën për sigurimin e padisë të paraqitur nga Shoqata e Avokatëve Antikorrupsion, duke vendosur pezullimin e efekteve të vendimeve të Dhomës së Avokatisë për bojkotin, deri në shqyrtimin e çështjes në themel.

Ndërprerja e bojkotit pritet t’i hapë rrugë rifillimit të proceseve gjyqësore të mbartura në GJKKO, disa prej të cilave janë shtyrë për shkak të mungesës së avokatëve mbrojtës.

Burimi ATSH