Presidentja e Kosovës, Vjosa Osmani deklaroi sot se një Shqipëri më e fortë do të thotë një Kosovë edhe më e fortë.

Duke iu drejtuar mbledhjes së përbashkët të dy Kuvendeve Kosovë- Shqipëri në Prishtinë, Osmani u shpreh se “po jetojmë në një kohë të trazuar që kërkon bashkëpunim”.

“Për Kosovën dhe Shqipërinë kjo nuk është thjesht një zgjedhje por një domosdoshmëri. Një Shqipëri më e fortë do të thotë një Kosovë edhe më e fortë. Një Kosovë më e suksesshme e ngre edhe më lart Shqipërinë”, tha ajo.

“Historia nuk do të na gjykojë me dashamirësi nëse nuk arrijmë ta shfrytëzojmë këtë moment për të ndërtuar unitetin dhe harmoninë e domosdoshme. Prosperiteti i Kosovës dhe i Shqipërisë është detyrë që na përket të gjithëve. Secili prej nesh duhet të luajë rolin e vet në avancimin e vizionit të shteteve dhe qytetarëve tanë brenda familjes së kombeve europiane”, theksoi ajo.

Osmani theksoi se kjo seancë e përbashkët parlamentare duhet të shërbejë si një thirrje për veprim, një kujtesë se qëllimi ynë i përbashkët kërkon ambicie edhe më të mëdha dhe përpjekje edhe më të palodhshme.

“Lidhja e thellë mes Kosovës dhe Shqipërisë është e rrënjosur në histori, në sakrifica të panumërta dhe në një vizion të përbashkët për të ardhmen. Kjo lidhje nuk është thjesht simbolike, është një themel i pathyeshëm mbi të cilin duhet të ndërtojmë bashkëpunim më të madh dhe koordinim më të shpeshtë”, shtoi ajo.

Sipas saj, “Shqipëria dhe Kosova nuk janë vetëm dy shtete të pavarura por janë dy pjesë të pandashme të një kombi të madh të bashkuar nga një histori e lavdishme dhe një e ardhme e ndritur që po ndërtohet dita-ditës”.

“Të dy parlamentet tona kanë një rol vendimtar në forcimin e lidhjeve dypalëshe dhe në avancimin e interesave të qytetarëve tanë”, shtoi ajo.

Burimi ATSH